जनादेश संवाददाता,
काठमाण्डौ । सरकारी स्वामित्वमा रहेको दूरसञ्चार सेवा प्रदायक नेपाल टेलीकमको फोरजी सेवा विस्तारमा भएको ढिलाइको कारण स्पष्ट गर्न संसदीय समितिले निर्देशन दिएको छ ।
प्रतिनिधिसभा अन्तर्गतको विकास तथा प्रविधि समितिको बैठकले टेलिकमको फोरजी सेवा विस्तारमा भएको ढिलाइको कारण सात दिनभित्र लिखित रूपमा समितिमा पेश गर्न निर्देशन सरकारलाई निर्देशन दिएको हो ।
बुधबार सञ्चार तथा सूचना प्रविधिमन्त्री डा. युवराज खतिवडा, मन्त्रालयका सचिव हरिप्रसाद बस्याल, नेपाल दूरसञ्चार प्राधिकरणका अध्यक्ष पुरुषोत्तम खनाल र टेलिकमका प्रबन्ध निर्देशक डिल्लीराम अधिकारीसँगको छलफलपछि समितिले यस्तो निर्देशन दिएको हो ।
समितिकी सभापति कल्याणीकुमारी खड्काले फोरजी सेवा विस्तार निर्धारित समयभित्र गुणस्तरयक्त रूपमा सम्मन हुन नसक्नुको कारण सात दिन भित्र लिखित रूपमा पेश गर्न सञ्चार तथा सूचना प्रविधि मन्त्रालय र दूरसञ्चार प्राधिकरणलाई निर्देशन दिने निर्णय गरएको जानकारी दिइन् ।
टेलिकमले विभिन्न बहनाबाजी गर्दै फोरजी विस्तारमा ढिलाइ गर्दा जनताले मोबाइल इन्टरनेटमा नयाँ प्रविधिको प्रयोग गर्न पाएका छैनन् भने टेलिकमको आम्दानी र नाफा पनि घट्न पुगेको छ ।
