जनादेश, काठमाडौं ।
सत्तारुढ नेपाल कम्युनिस्ट पार्टी (नेकपा) का अध्यक्ष तथा प्रधानमन्त्री केपी शर्मा ओली र अर्का अध्यक्ष पुष्पकमल दाहाल ‘प्रचण्ड’ बीच आइतबार भेटवार्ता भएको छ । बिहान करिब १० बजेदेखि सुरु भएको छलफल झन्डै तीन घण्टा चलेको छ ।
छलफलमा वरिष्ठ नेता झलनाथ खनाल र सुवास नेम्वाङ पनि सहभागी थिए । केही समय यता पार्टी भित्र बढेको विवादबीच आज भएको छलफलले केही निष्कर्ष नगरेको जनाइएको छ । छलफलमा सहभागी नेताका अनुसार आजका भेटलाई छलफलको सुरुवातका रुपमा लिन सुझाएका छन् । गत साउन १३ गते बोलाइएको बैठक ओलीले एकलौटी स्थगित गरिदिएपछि प्रचण्ड र माधवकुमार नेपाल पक्षका नेताहरुको बैठक बसेको थियो । बैठकले ओलीसँग छलफल गरेर छिट्टै बैठक राख्ने पहलकदमी गर्ने जिम्मा प्रचण्डलाई दिएको थियो । बहुमत सदस्यको बैठकअघि पनि प्रचण्ड र खनाल ओलीलाई बैठकमा उपस्थितिको लागि अनुरोध गर्न गएका थिए। तर, ओलीले अस्वीकार गरेका थिए।
गत असार १० गतेदेखि जारी नेकपाको स्थायी कमिटी बैठक पटकपटक स्थगित हुँदै आएको छ।
