नेपाल संस्कृत विश्वविद्यायलमा उपकुलपति यादवप्रसाद लामिछानेले पदबाट राजीनामा दिएका छन् । प्रधानमन्त्री केपी शर्मा ओलीले उनको राजीनामा स्वीकृत गरेका छन् ।
संस्कृत विश्वविद्यालयमा उपकुलपति लामिछाने र कुलसचिव माधवप्रसाद अधिकारीबीच द्वन्द्व बढेपछि लामिछानेले राजीनामा दिएका हुन् । उपकुलपति लामिछानेले कुलसचिव अधिकारीलाई आर्थिक अनियमितताको आरोपमा निलम्बन गरेका थिए ।
तर, प्रधानमन्त्री र एमाले महासचिव शंकर पोखरेलको दबाबमा उनले कुलसचिवमाथिको निलम्बन फुकुवा गरेका थिए । यता, कुलसचिव अधिकारीले भने उपकुलपति लामिछानेले आफ्ना निकटकालाई नयाँ नियुक्ति र बढुवा गर्न थालेपछि आफूले सहमति नदिएको बताएका छन् ।
उपकुलपति लामिछानेले नेपाल संस्कृत विश्वविद्यायलका कुलपतिसमेत रहेका प्रधानमन्त्रीसमक्ष साउन २७ गते राजीनामा दिएका थिए । उनको राजीनामा आज स्वीकृत गरिएको प्रधानमन्त्रीको सचिवालयले जनाएको छ ।
