एजेन्सी ।
युएईमा जारी १३ औं संस्करणको इन्डियन प्रिमियर लिग आईपीएल क्रिकेटमा आज सनराइजर्स हैदराबाद र चेन्नई सुपर किङ्सबीच प्रतिस्पर्धा हुँदैछ ।
दुबई इन्टरनेश्नल क्रिकेट स्टेडियममा खेल नेपाली समय अनुसार राती पौने ८ बजे सुरु हुनेछ । हैदराबाद र चेन्नई आफ्नो आठौं खेलका लागि मैदान उत्रने छन् ।
डेभिड वार्नरको कप्तानीमा रहेको हैदराबाद चौंथो जितको खोजीमा हुनेछ । हैदराबाद ७ खेलमा ६ अंक जोडेर पाँचौ स्थानमा रहेको छ ।
चेन्नईलाई हराएर हैदराबाद अंक तालिका सुधार गर्न चाहन्छ । तर, महेन्द्र सिंह धोनीको कप्तानीमा रहेको चेन्नईलाई हराउँन हैदराबादलाई सहज भने हुने छैन । हैदराबादलाई हराएर चेन्नई तेस्रो जित निकाल्ने लक्ष्यमा हुनेछ । चेन्नई ७ खेलमा ४ अंक जोडेर पुछारबाट दोस्रो स्थानमा रहेको छ ।
यस्तै चेन्नई पहिलो भेटमा व्यहोरेको हारको बदला समेत लिने योजनामा हुनेछ । यसै सिजनको पहिलो भेटमा चेन्नईलाई हैदराबादले ७ रनले पराजित गरेको थियो ।
हैदराबाद भने चेन्नईलाई लगातार दोस्रो भेटमा पराजित गर्न चाहन्छ ।
यस अघि सोमबार भएको खेलमा कोलकतालाई ८२ रनले पराजित गर्दै बैंगलोरले पाचौँ जित निकालेको थियो । आइपिएल अंकतालिकाको शीर्ष स्थानमा मुम्बाइ र दोश्रो स्थानमा दिल्ली क्यापिटल्स छन् ।
