जनादेश, काठमाण्डौ ।
बागलुङको ढोरपाटन नगरपालिकामा बुधबार राति परेको अविरल वर्षाका कारण आएको बाढीमा ज्यान गुमाउने प्रति नेकपा अध्यक्ष प्रचण्डले दुख व्यक्त गर्नुभएको छ ।
सामाजिक संजाल टिव्टरमा अध्यक्ष प्रचण्डले दिवंगत भएकाहरु प्रति श्रद्धाञ्जली प्रकट गर्नुभएको हो ।
“बागलुङको ढोरपाटन–९ को सुकुर्दुङ खोलामा आएको बाढीले बगाएर ११ जनाको मृत्यु र ३० जना बेपत्ता भएको घटनाले मलाई स्तब्ध बनाएको छ ।
उक्त दुखद् घटनामा परी निधन हुनुभएकाहरुमा श्रद्धाञ्जली अर्पण गर्दै शोक सन्तप्त परिवारजनमा समवेदना व्यक्त गर्दछु,” अध्यक्ष प्रचण्डले उल्लेख गर्नुभएको छ ।
उक्त पहिरोग्रस्त क्षेत्रबाट बगेको बढीघाट खोला धेरै मात्रामा गुल्मीको भूभाग हुँदै बग्ने भएका कारण बाढीपहिरामा हराइरहेका अन्य गुल्मीमा भेटिन सक्ने अनुमान गरिएको छ ।
बुधबार राति परेको अविरल वर्षाका कारण आएको बाढीले बढीघाट खोलामा पानीको बहाव बढेकाले स्थानीय प्रशासनले खोला किनारमा बसोबास गर्ने मानिसलाई सुरक्षित रहन आग्रह गरेको छ ।
सुरक्षा निकायले हराइरहेका ३० जनाको खोजी गरिहरेको बताइएको छ ।
