एजेन्सी ।
बार्सिलोना छोड्ने सबै प्रयास असफल भएपछि लियोनल मेस्सी क्लबको यो सिजनको प्रशिक्षणमा फर्किने पक्का भएको छ ।
क्लबसँगको सम्झौता अनुसार थप एक सिजन बार्सिलोनामै बस्ने निष्कर्षमा पुगेका मेस्सी सोमबारदेखि प्रशिक्षणमा सहभागी हुने क्लबले जनाएको छ ।
मेस्सीले नयाँ प्रशिक्षक रोनाल्ड कोम्यानसंग भेट गरी अर्को एक सिजनसम्म बार्सिलोनामै बस्ने बिषय अवगत गराउनेछन् । र मेस्सीको बसाइ अवधिबारेको निर्णय नयाँ अध्यक्षमा भर पर्नेछ ।
बार्सिलोनाले सन् २०२१ को मार्चमा नयाँ नेतृत्व छान्दैछ । सोही निर्वाचनबाट वर्तमान अध्यक्ष जोसेप मारिया बर्टोमेउलाई प्रतिस्थापन गर्ने ब्यक्तिले लिने निर्णयमा मेस्सीको क्लबसँग आवद्धताको भविष्य पनि जोडिने छ ।
केही दिन अघि मात्र मेस्सीले ७० करोड युरो तिर्न बाध्यपार्ने क्लबको निर्णयले आफू बाहिरिन नसकेको बताएका थिए । आफू हुर्किएको क्बलविरुद्ध मुद्धा मामिला गर्न उचित नलागेर क्लबमै बसेको उनको भनाई थियो ।
र यो पनि- निराश भएपछि मेस्सीले भनेः मुद्दा मामिला गर्नुभन्दा बार्सामै बस्छु
