जनादेश सोसल मिडिया वाच ।
नेपाल कम्युनिष्ट पार्टी नेकपाका दाहाल-नेपाल समूहका नेता योगेश भट्टराईले प्रधानमन्त्री केपी शर्मा ओलीलाई सामाजिक सञ्जालबाटै झटारो प्रहार गरेका छन् ।
आफूलाई ‘केटो’ भनेर सम्बोधन गर्ने प्रधानमन्त्री ओलीलाई नेता योगेश भट्टराईले सोही शैलीमा जवाफ दिएका हुन् ।
ओलीले शनिबार काठमाडौंमा आयोजित आफ्नो समूहको नेकपा प्रदेश १ सम्पर्क कमिटीको भेलामा नेता भट्टराईलाई ‘आफैंले नेता र मन्त्री बनाइदिएको केटाले अहिले आफैंलाई लात हानेर हिँडेको’ भन्दै व्यङ्ग्यात्मक टिप्पणी गरेका थिए ।
पूर्वएमाले खेमाका नेता भट्टराई ओली समूह छाडेर प्रचण्ड-माधवकुमार नेपाल नेतृत्वको नेकपामा लागेपछि ओली रुष्ट भएका हुन्।
प्रधानमन्त्री ओलीलाई शनिबार राति सामाजिक सञ्जालमार्फत जवाफ दिँदै पूर्वमन्त्री भट्टराईले भनेका छन्, ‘केटा र केटीहरूको रगत, पसिना र मेहनतको जगमा खडा भएको व्यवस्थामै यहाँले कुर्सी प्राप्त गर्नुभएको हो, केटो भनिपाउँदा मलाई दुःख छैन। तपाईंको स्तर थाहा पाएँ खुसी लाग्यो।’
केटा र केटीहरुको रगत, पसिना र मेहनतको जगमा खडा भएको ब्यबस्था मै यहाँले कुर्सीप्राप्त गर्नुभएको हो ।
केटो भनिपाउदा मलाई दु:ख छैन । तपाईंको स्तर थाहा पाएँ खुशी लाग्यो ।— Yogesh Bhattarai (@yogesbhattarai) January 16, 2021
२०७४ को चुनावका क्रममा देशमा ५० भन्दा धेरै निर्वाचन क्षेत्रमा भाषण गर्न पुगेकाप्रधानमन्त्री ओलीले ताप्लेजुङ पुगेर योगेशलाई जिताए मन्त्री बनाउने जिम्मा आफ्नो भन्दै भाषण दिएका थिए । तर योगेशले चुनाव जित्नेबित्तिकै उनले मन्त्री बनाएनन् ।
पछि हेरफेरका क्रममा मात्र उनलाई मन्त्री पद दिइएपनि ओलीले संसद विघटन गरेपछि योगेशले राजीनामा दिएका थिए ।
