जनादेश वाच ।
सोमबार (हिजो) मध्यरातमा नेपाली सेनाले काठमाडौँको सडकमा बख्तरबन्द परेड निकालेपछि यसबारे अनेक कोणबाट विश्लेषण भैरहेको छ ।
तत्कालीन राजा ज्ञानेन्द्रले निर्वाचित सरकारलाई कू गरेकै दिन पारेर मध्यरातमा १० युद्ध कवज गण स्वयम्भूबाट हातहतियारले सुसज्जित बख्तरबन्द गाडीसहित सडकमा नेपाली सेनाले परेड निकालेको हो ।
ज्ञानेन्द्र शाहले आफ्नो शासन हातमा लिँदा पनि यसैगरी बख्तरबन्द गाडी सडकमा निकालिएको थियो। 
प्रधानमन्त्री केपी शर्मा ओलीले पुस ५ गते प्रतिनिधिसभा विघटन गरेपछिको विकसित राजनीतिक घटनाक्रम भइरँदा नेपाली सेनाले भने उक्त परेडले धेरैलाई झसक्काएको छ । कतिपयले यसलाई ‘माघ १९ कै छेको पारेर किन सडकमा बख्तरबन्द गाडीको परेड’ भनेर प्रश्न समेत उठाएका छन्।
तर नेपाली सेनाले यसलाई ‘नियमित अभ्यास’ नै भनेको छ । सेनाका अनुसार व्यारेकभित्र गरेको अभ्यासलाई अझ निखार्नको लागि सडकमा पनि अभ्यास गर्नुपर्ने हुन्छ। त्यसका लागि सडक जाम नहुने समय पारेर रातिको समयमा सैन्य गाडी सडकमा निकालिएको छ ।
सैनिक प्रवक्ता तथा सहायकरथी सन्तोषबल्लभ पौडेलले नियमित अभ्यास योजना अनुसार सोमबार राति सेनाको गाडीले चक्रपथको चक्कर लगाएको बताएका छन्। सेनाका अनुसार राति बख्तरबन्द गाडीहरुले काठमाडौं चक्रपथको एक चक्कर लगाएका थिए ।
नागरिक अगुवाहरुले सत्तामा प्रधानमन्त्री केपी ओलीको रजगज भएको बेला ‘सेनाले बख्तरबन्द गाडीमा चढेर चक्रपथ चक्कर मार्नुको साङ्केतिक अर्थ के हो ? भन्ने प्रश्न गरेका छन्।
एक राष्ट्रिय दैनिक प्रितिक्रिया दिएका सामरिक तथा भूराजनीतिक मामिला जानकार गेजा शर्मा वाग्लेले भने अहिलेको परिस्थितिमा सेनाले गर्ने अभ्यासले आशंका र संशय पैदा गरेको टिप्पणी गरेका छन् । ‘प्रतिनिधिसभा विघटनपछि सिर्जना भएको अत्यन्त तरल, जटिल र अन्योलपूर्ण राजनीतिक घडीमा सेनाले राजधानीलगायत देशका विभिन्न स्थानमा गर्ने अभ्यासले आशंका र संशय सिर्जना गरेको छ,’ वाग्लेले भनेका छन्, ‘सेनाले नियमित अभ्यासको संज्ञा दिएको छ, तर यो संयोग मात्रै नहुन सक्छ । विकसित राजनीतिक तथा सुरक्षा परिस्थितिको विश्लेषण गर्दै सेनाले मनोवैज्ञानिक सांकेतिक सन्देश दिन चाहेको देखिन्छ, जुन अर्थपूर्ण छ ।’
