मुठभेडको मुडः विहानै ट्याक्सी जलाइयो, सडकमा निस्केकाअष्टलक्ष्मी शाक्यसहित दर्जनौं नेता पक्राउ

जनादेश अपडेट ।

नेपाल कम्युनिष्ट पार्टी नेकपा प्रचण्ड- माधव समूहले आयोजना गरेको आम हड्ताल मुठभेडको मोर्चा बन्ने संकेत देखिएको छ ।

आमहड्ताललाई शान्तिपूर्ण बनाउने बताइएपनि बिहीबार बिहानै काठमाडौँको गोंगबुमा एक ट्याक्सीमाथि आगजनी गरिएको छ भने प्रहरीले पनि व्यापक धरपकड गरेको छ ।

आज विहानै गोंगबुमा कुम्भ नारायण श्रेष्ठको प्रदेश ३–०१ ००२ ज ५८८१ नम्बरको ट्याक्सीमा आगजनी गरिएको छ ।

सरकारले संविधानलाई बेवास्ता गर्दै संवैधानिक निकायहरुमा नियुक्ति गरेको भन्दै त्यसको विरोधमा बिहीबार देशव्यापी आम हड्ताल प्रचण्ड–नेपाल पक्षले जनाएको छ ।

यसैबीच, बिहानैदेखि बन्द गर्न हिँडेका प्रचण्ड–नेपाल समूहका कार्यकर्ताहरुलाई प्रहरीले पक्राउ गरेको छ ।

आम हड्ताल सफल पार्न सडकमा निस्किएका २७ जनालाई काठमाडौंमा समातिएको युवा संगठन नेपालका अध्यक्ष रामप्रसाद सापकोटा दीपशिखाले जनादेशलाई जानकारी दिएका छन् ।

त्यस्तै नेकपा प्रचण्ड-नेपाल समूहका नेता विष्णु रिजालले अष्टलक्ष्मी शाक्य लगायतका नेताहरुलाई गिरफ्तार गरिएको जनाएका छन् ।

उनले फेसबुकमा लेखेका छन्, ‘आज विहानै निरंकुश सरकारले नेकपा स्थायी कमिटी सदस्य अष्टलक्ष्मी शाक्यलगायतका नेताहरूलाई कलंकीबाट गिरफ्तार गरेको छ ।’

 

विहानको अवस्था हेर्दा आम हड्तालको समय मुठ्भेडका लागि सहायक बन्ने खतरा देखिएको छ ।