जनादेश सोसल मिडिया वाच ।
संसद पुनर्स्थापना भएपछि नैतिकताको आधारमा प्रधानमन्त्री पद छोड्न केपी ओलीलाई दबाब दिएको भन्दै पूर्वएमाले नेताहरुबीच आरोप प्रत्यारोप सुरु भएको छ । खासगरी केपी ओली पक्षका नेताहरुले पूर्वएमालेहरुले यस्तो प्रश्न सोध्न नमिल्ने दाबी गरेका छन् ।
उपप्रधानमन्त्री ईश्वर पोखरेलले नेकपा प्रचण्ड नेपाल समूहका अध्यक्ष माधव नेपालमाथि प्रधानमन्त्री केपी ओलीको राजीनामा मागेकोप्रति आक्रोश व्यक्त गरेका छन् । तत्कालीन मनमोहन अधिकारी नेतृत्वको अल्पमतको सरकारले संसद् भंग गर्दा अदालतले पुनःस्थापना गरिदिएको घटना नेपाललाई ओली समूहका नेता पोखरेलले स्मरण गराएका हुन् ।
उनले शनिबार साझा ट्वीट गर्दै,’ताजा जनादेशका लागि तत्कालीन प्रधानमन्त्री मनमोहन अधिकारीले प्रतिनिधि सभा भंग गर्न गर्नुभएको सिफारिसलाई २०५२ भदौ १२ गते सर्वोच्च अदालतले खारेज गरेको थियो । उहाँले अस्पतालकै बेडबाट आफूमाथि लगाइएको अविश्वासको प्रस्तावको जवाफ दिनुभएको थियो । मनमोहन अधिकारीले अस्वस्थता कारण बोल्न कठिन भएपछि तत्कालीन उपप्रधानमन्त्री माधवकुमार नेपालले जवाफ दिने कामलाई निरन्तरता दिनुभएको थियो ।’
सरकार संचालनमा गतिरोध सिर्जना हुनपुगेपछि सार्वभौम जनतामा गएर ताज़ा जनादेशका माध्यमबाट समाधान गर्ने प्रमको राजनीतिक प्रयत्नलाई कानूनी आवरणमा निस्तेज बनाउने काम भएकोछ ।सर्वोच्च अदालतको फ़ैसलाले मुलुकको राजनीतिलाई थप अस्थीर र जटिल बनाउनेछ ।निर्णयलाई माने पनि सम्मान गर्न सकिन्न ।
— Ishwar Pokhrel (@IshwarPokhrel) February 23, 2021
त्यतिबेला एमालेले अदालतको निर्णयविरुद्ध सडक आन्दोलनको नेतृत्व नेपालले गरेको थियो । उनले यस्तो पृष्ठभूमिसित गाँसिएका नेपालले समेत नैतिकताको हवाला दिएको भन्दै प्रश्न उठाए ।
‘यस्तो पृष्ठभूमिसित गाँसिएकाहरूले समेत नैतिकताको हवाला दिँदै अहिले प्रधानमन्त्री केपी ओलीले राजीनामा गर्न दबाब दिइरहेका छन् । यस्तो अनुचित, क्षुद्र र अनैतिक दवाव किन ?.’ पोखरेलको प्रश्न छ ।
ताजा जनादेशका लागि तत्कालिन प्रधानमन्त्री मनमोहन अधिकारीले प्रतिनिधि सभा भंग गर्न गर्नुभएको सिफारिसलाई २०५२ साल भदौ १२…
Posted by Ishwar Pokhrel on Saturday, 27 February 2021
प्रधानमन्त्री ओलीका प्रमुख राजनीतिक सल्लाहकार विष्णु रिमालले पनि मनमोहनकै पालाको घटना स्मरण गराएका छन् ।
प्रतिनिधिसभा बिघटनको सिफारिस र
सर्वोच्चबाट पुन:स्थापना,
प्रधानमंत्रीको राजिनामा र नैतिकताको प्रश्न
यी बिषयमा —
प्रश्न गर्ने र जवाफ दिने हामीहरू
२०५२ सालमा पनि थियौं र अहिले पनि छौं।
त्यो बेला जे गरेका थियौं/ भनेका थियौं,
त्यसै गर्दा अहिले चॉहि नहुने किन रहेछ?!
#जिज्ञासा_मात्र— Bishnu Rimal (@BishnuRimal) February 27, 2021
संसद्को सर्वोच्चतालाई मानेर त्यसको सामना गर्ने यस अघिकै जस्तो कुरा गर्दा केको आपत्ति भन्दै उनको थप प्रश्न छ ।
