जनादेश, काठमाडौँ ।
नेपाली कांग्रेसले बाग्लुङमा भएको घटनाको निश्पक्ष छानविन गर्न माग गरेको छ ।
कांग्रेस प्रवक्ता विश्वप्रकाश शर्माले एक विज्ञप्ती जारी गर्दै होली खेल्ने नाममा आफ्ना पार्टीका कार्यकर्ता मारिएको भन्दै निश्पक्ष छानविन गर्न माग गरेका हुन् ।
होली खेल्ने नाममा असमझदारी र आवेगले हो वा योजनाबद्ध षड्यन्त्रले हत्या भएको हो यसको छानविन गरि दोषीलाइ कारवाही गर्न माग गरिएको छ । आइतबार गुल्मी र प्युठानको सीमाना जोडिएको बाग्लुङ जिल्लाको बल्देधुरीमा भएको घटनामा प्रकाश कुँवर र दीपक नेपालीको मृत्यु भएको थियो ।
प्रकाश कुँवर नेपाली कांग्रेसका जिल्ला कार्य समितिका सदस्य हुन् । दुवै युवाको मृत शरिर भीरबाट करिब ४ सय मिटर तल भेट्टिनुले हत्या गरि फालिएको वा भीरबाट धकेलेर हत्या गरिएको हुनसक्ने भन्दै निश्पक्ष छावनि गर्न कांग्रेसले माग गरेको हो ।
वाग्लुङ घटनाको निश्पक्ष छानविन गरि सत्यतथ्य सार्वजनिक गर्न र कडा कानूनी कारवाही अगाडी बढाउन समेत विज्ञप्तीमा माग गरिएको छ ।
