जनादेश वाच ।
पूर्वप्रधानमन्त्री डा.बाबुराम भट्टराईले नेपालमा नयाँ राजनीतिक मोर्चा बन्न लागेको संकेत गरेका छन् । जनता समाजवादी पार्टी (जसपा)का संघीय परिषद् अध्यक्षसमेत रहेका भट्टराईले सामाजिक सञ्जालमार्फत् अब नयाँ विचारसहित नयाँ मोर्चा बन्न लागेको बताएका हुन् ।
बाबुरामले कम्युनिस्ट नेता कार्यकर्तालाई समाजवादी ध्रुवीकरणमा लाग्नसमेत आग्रह गरेका छन्। विभिन्न घटकमा विभाजित नेपालका कम्युनिस्ट नेता-कार्यकर्ता उल्टो दिशामा हिँडिरहेको भन्दै बाबुराम भट्टराईले ध्रुवीकरणमा जोड दिएका हुन् ।
लामो समय कम्युनिस्ट पार्टीमा आवद्ध रहेका र तत्कालिन माओवादीले सञ्चालन गरेको १० वर्षे जनयुद्धको नेतृत्वसमेत गरेका नेता भट्टराईले मान्छेले मान्छेमाथि गर्ने सबै खाले विभेद र उत्पीडनको अन्त्य गर्ने कम्युनिस्टको लक्ष्यलाई स्टालिनदेखि ओलीसम्मले उल्टो दिशातिर सोझाएको आरोप लगाएका छन्।
‘नेकपाका विभिन्न घटकमा रहेका कमरेडहरूसँग आग्रह : मान्छेले मान्छेमाथि गर्ने सबै खाले विभेद र उत्पीडनको अन्त्य गर्ने लक्ष्य स्टालिनदेखि ओलीसम्म आइपुग्दा किन र कसरी उल्टो दिशातिर सोझियो?’ नेता भट्टराईले ट्वीटरमा लेखेका छन्, ‘पुरानै बाटो हिंडेर नयाँ ठाउँमा कसरी पुगिएला? अब नयाँ विचारसहित नयाँ समाजवादी ध्रुवीकरणमा लाग्ने कि?’
नेकपाका विभिन्न घटकमा रहेका कमरेडहरूसंग आग्रह:-मान्छेले मान्छेमाथि गर्ने सबै खाले विभेद र उत्पीडनको अन्त्य गर्ने लक्ष्य स्टालिनदेखि ओलीसम्म आइपुग्दा किन र कसरी उल्टो दिशातिर सोझियो?पुरानै बाटो हिंडेर नयॅा ठाउॅमा कसरी पुगिएला?अब नयॅा विचारसहित नयॅा समाजवादी ध्रुवीकरणमा लाग्ने कि?
— Baburam Bhattarai (@brb1954) August 7, 2021
यसअघि माओवादी केन्द्रका अध्यक्ष पुष्पकमल दाहाल प्रचण्डले नेकपा एमालेका वरिष्ठ नेता माधव नेपाललाई पनि समाजवादी केन्द्र बनाउने प्रस्ताव राखेको समाचार सार्वजनिक भएको थियो ।
प्रचण्डले बाबुरामसहित विप्लव, मोहन बैद्य, विश्वभक्त दुलाल आहुति लगायतका कम्युनिष्ट पार्टीहरूलाई एकै ठाउँमा राखेर बनाइने समाजवादी केन्द्रको अध्यक्ष बन्न समेत माधव नेपाललाई आग्रह गरेका थिए ।
प्रचण्डलाई कम्युनिस्ट पार्टीबीच एकता गरेर जान सुझाव आइरहेका बेला उनले नेता नेपाललाई समाजवादी केन्द्रको अध्यक्ष बनेर एकताको भूमिका खेल्न प्रस्ताव गरेका हुन् । बाबुरामको प्रस्ताव पनि त्यही लाइनमा आएको कतिपयको बुझाई छ ।
