जनादेश सोसल मिडिया वाच ।
केही समयअघि नेकपा एमालेका अध्यक्ष केपी शर्मा ओलीले आफूलाई फोन गरेको भनेर सामाजिक सञ्जालमार्फत खुसी प्रकट गरेकी अभिनेत्री करिश्मा मानन्धरले एमालेमा प्रवेश गर्ने वा गरिसकेको संकेत गरेकी छन्।
लामो समयदेखि एमाले अध्यक्ष केपी ओलीलाई भेट्ने चर्चा गरिरहेकी करिश्माले अन्ततः ओलीसँग भेट गरेकी छन्। केही समयदेखि ओलीले आफूलाई फोन गरेको भनेर निकै खुसीका साथ प्रचार गरिरहेकी करिश्माले उनीसँग भेटेको कुरा तस्बिरसहित जानकारी दिएकी हुन्। यस क्रममा उनले पूर्वप्रधानमन्त्रीसमेत रहेका एमाले अध्यक्ष ओलीको प्रशंसा गर्दै धन्यवादसमेत ज्ञापन गरेकी छन्।
‘उहाँको नजिक बसेर विविध विषयमा उहाँको विचारहरू सुन्दा आनन्द आयो’, करिश्माले भनेकी छन्, ‘सबै क्षेत्रका मानिसहरूलाई उत्तिकै महत्त्वका साथ लिनुभएकोमा र चासो मानेर कुरा सुनिदिनु भएकोमा आदरणीय केपी ओलीज्यूलाई धेरै धन्यवाद।’
साथमा गायिका एवं एमालेकै सांसद कोमल वली र कलाकार जितु नेपाल पनि देखिएका छन्। प्रायः टोपीमा देखिने ओली करिश्मासँगको भेटमा भने खाली टाउकोमै देखिएका छन्।
भेटमा सहभागी हास्य कलाकार जितु नेपाल ‘मुन्द्रे’का अनुसार यो भेट भक्तपुरको बालकोटस्थित एमाले अध्यक्ष ओलीकै निवासमा भएको हो।
