जनादेश वेदर।
पश्चिमी न्यून चापीय प्रणालीको प्रभावका कारण अझै केही दिन मौसम प्रभावित हुने भएको छ ।
मौसम पूर्वानुमान महाशाखाका अनुसार देशका धेरै स्थानमा मेघ गर्जन/चट्याङ/असिनासहित हल्कादेखि मध्यम वर्षाको सम्भावना छ । त्यस्तै गण्डकी तथा लुम्बिनी प्रदेशका एक-दुई स्थानमा भारी वर्षा हुन सक्ने छ ।
देशका उच्च पहाडी तथा हिमाली भूभागका धेरै स्थानमा हल्कादेखि मध्यम हिमपातको सम्भावना रहेको महाशाखाले जनाएको छ । शुक्रबार देशभर सामान्यदेखि पूर्ण बदली भइ धेरै स्थानमा मेघ गर्जन/चट्याङ/असिनासहित हल्कादेखि मध्यम वर्षाको सम्भावना छ । साथै गण्डकी तथा लुम्बिनी प्रदेशका एक-दुई स्थानमा भारी वर्षा हुन सक्ने छ । उच्च पहाडी तथा हिमाली भूभागका धेरै स्थानमा हल्कादेखि मध्यम हिमपातको सम्भावना छ ।
शनिबार प्रदेश १, मधेस प्रदेश, बागमती र गण्डकीमा आंशिकदेखि सामान्य बदली रही अन्य प्रदेशमा आंशिक बदली रहनेछ । देशका पूर्वी तथा मध्य भूभागका उच्च पहाडी तथा हिमाली भूभागका थोरै स्थानमा हल्का हिमपातको सम्भावना मौसम पूर्वानुमान महाशाखाले जनाएको छ ।
