नेपाल औषधि उत्पादक संघले ५ सय एमजीको सिटामोल उत्पादन रोक्न लागिएको समाचारप्रति ध्यानाकर्षण भएको जनाएको छ ।
एक विज्ञप्ति जारी गर्दै संघले ५ सय एमजीको सिटामोल उत्पादन निरन्तर भई ६५० एमजी पनि उत्पादन गर्नका लागि अनुमति प्रदान भएको हुँदा ५ सय एमजी पनि अभाव नहुने र आवश्यकता अनुसार ६५० एमजि पनि उपलब्ध हुने बताएको छ ।
‘पारासिटामोल ५०० एमजीलाई विस्थापित गरी ६५० एमजी मात्र उत्पादन गर्ने भन्ने भ्रमपूर्ण अभिव्यक्तिहरु देखिएको हुनाले सबैमा ५०० एमजीको उत्पादन निरन्तर भई ६५० एमजीको पनि उत्पादन गर्नको लागि अनुमति प्रदान भएको हुँदा ५०० एमजी पनि अभाव नहुने र आवश्यकता अनुसार ६५० एमजी पनि उपलब्ध हुने समेत ध्यानाकर्षण गराउन चाहन्छौँ’ विज्ञप्तिमा उल्लेख छ ।
यसअघि चैत १० गते बसेको औषधि सल्लाहकार समितिको ५३ औँ बैठकले नेपालमा पनि ६५० एमजीको पारासिटामोल उत्पादन गर्ने निर्णय गरेको थियो । तर, उपभोक्ता हित संरक्षण मञ्च, नेपाल फार्मेसी संघ र नेपलिज एशोसिएसन अफ क्लिनीकल फर्मासिस्टले भने अध्ययन अनुसन्धान बिनानै पारासिटामोलकाे डोज बढाइएको भन्दै उक्त निर्णयको विरोध गर्दे आइरहेको छ ।
