जनादेश संवाददाता,
रुकुम । रुकुम पश्चिम स्थित त्रिवेणी गाउँपालिकाको बजेट आफ्नो खातामा हाल्ने लेखा सहायक सुवास केसीलाई जागिरबाट निकालिएको छ ।
केसीले सरकारी बजेट आफ्नो सहितश्रीमती र भतिजाको खातामा हालेपछि वडा अध्यक्ष झक्कुप्रसाद घर्तीको संयोजकत्वमा गठन गरेको छानबिन कार्यदलले केसीलाई जागिरबाट निकाल्ने निर्णय गरेको हो ।
छानबिनको क्रममा केसीले आफ्नो सहितश्रीमती र भतिजाको खातामा झण्डै २५ लाख रुपैयाँ जम्मा गरेको पाइएको छ । गाउँपालिकामै कार्यरत सुवासका काका समेत रहेका लेखापाल हेमन्त केसीको सहयोगमा आफ्नो खातामा मात्रै गाउँपालिकाको सात लाख ९१ हजार रुपैयाँ रकम जम्मा गरेका थिए ।
लेखापाल केसीले सुवासको तलब र भत्ताको लागि भन्दै गाउँपालिकामा जवाफ दिएका थिए । जेठ महिनामा करारमा नियुक्त भए पनि उनले फागुनदेखि नै महिनाको १ लाख ५६ हजारका दरले तलब र भत्ता बुझेको देखिएको कार्यदलले जनाएको छ ।
