जनादेश सोसल मिडिया वाच।
जनमत पार्टीका अध्यक्ष सीके राउतले सरकारमा नसमेटिएपछि आक्रोश व्यक्त गरेका छन् । बुधबार राति सामाजिक सञ्जालमार्फत् अध्यक्ष राउतले सरकार पक्षप्रति आक्रोश व्यक्त गरेका हुन् ।
‘कुरा केवल जनमत पार्टीको होइन, जनता समाजवादी पार्टी, लोकतान्त्रिक समाजवादी पार्टी, जनमत पार्टी, नागरिक उन्मुक्ति पार्टी सबैलाई पाखा लगाउँदै शासकवर्गले बूलडोज गरेको छ,’ उनले लेखेका छन् ।
उनले सत्तापक्षले आफूहरूलाई बहिष्ककरण गरेको आरोप लगाएका छन् । ‘पश्चगामी चरम नश्लवादीहरूको झुण्डले पूरै मधेशी र थारूलाई राज्यबाटै बहिष्करण गर्दै, यो देश तिम्रोहोइन भन्ने सन्देश दिँदै, अधिकार खोस्दै, दमन शोषण गर्न अगाडि बढेको हो,’ उनले लेखेका छन् । मधेशले यसको प्रतिकार गर्ने राउतको चुनौती छ । ‘मधेशले यसको प्रतिकार गर्नेछ,’ उनले भने, ‘सडक र आन्दोलनको विकल्प हामीसँग सँधै खुल्ला नै छ ।’
शोषित नागरिक रहेसम्म धर्तीमा तुफान आइरहने उनले बताएका छन् ।
