तनहुँ,
तनहुँमा कोभिड–१९ को शङ्कास्पद बिरामीका लागि दु्रत परीक्षण गर्न जिल्लामै पिसिआर मेशिन खरिद गर्ने भनी गरेको निर्णय दुई महिना बितिसक्दा पनि कार्यान्वयनमा आउन सकेको छैन ।
गत जेठ २८ गते तनहुँका स्थानीय तहका प्रमुखसहितको बसेको बैठकले जिल्लामै कोरोना परीक्षणका लागि मेशिन खरिद गर्ने निर्णय गरेपछि कार्यान्वयनमा ल्याउन नसकेको हो । स्वाब सङ्कलन गर्दै परीक्षणका लागि पोखरा पठाउनुपर्ने र पालो पर्खिनुपर्ने बाध्यता अन्त्य गर्न यहाँका दशवटै पालिकाको बैठकले खरिद गर्ने निर्णय गरेको थियो । मेशिन खरिदका लागि रु एक करोड बजेट सबै स्थानीय तहले ब्योहोर्ने गरी निर्णय भएको थियो ।
सोहीबमोजिम शुक्लागण्डकी नगरपालिकाले रु १४ लाख, व्यास नगरपालिका, भिमाद नगरपालिका र भानु नगरपालिकाले रु १२÷१२ लाख, गाउँपालिका म्याग्दे, आँबुखैरेनी, बन्दीपुर, ऋषिङ र घिरिङले रु नौ÷नौ लाख र देवघाट गाउँपालिकाले रु पाँच लाख बजेट सहयोग गर्ने निर्णय गरेका थिए । शुक्लागण्डकी नगरपालिकाका प्रमुख किसान गुरुङले पोखरास्थित प्रयोगशालाबाट तत्कालै रिपोर्ट आउन थालेपछि मेशिन खरिद प्रक्रियामा नगएको बताउनुभयो । हाल जिल्लामा कोरोना सङ्क्रमितको सङ्ख्या बढ्दै गएकोले मेशिनको अभाव महसुस गर्न थालिएको छ ।
पाँच पालिकामा सिल
विश्वव्यापी महामारीको रूपमा फैलिएको कोभिड–१९ भाइरसका कारण पालिकाका समुदायस्तरमा कोरोना प्रभावित हँुदै जान थालेपछि तनहुँका पाँच पालिका सिल गरिएको छ । जिल्लामा रहेका दश पालिकामध्ये तीन गाउँपालिका र दुई नगरपालिका गरी पाँच पालिकामा समुदायस्तरका ३२ जनामा कोरोना पुष्टि भएपछि सिल गरिएको हो ।
सबैभन्दा धेरै भानु नगरपालिकामा २४ कोरोना सङ्क्रमित रहेका छन् । नगरपालिकाले साउन २७ गतेदेखि भदौ २ गतेसम्म लकडाउनको घोषणा गरेको छ । लकडाउनको अवधि सकिन लागे पनि कोरोनाको प्रभाव रहिरहेकाले समय थप गर्ने तयारी भइरहेको नगरप्रमुख उदयराज गौलीले बताउनुभयो ।
व्यास नगरपालिका–१ रत्यौलीमा एकै परिवारमा पाँच जनामा कोरोना पुष्टि भएपछि नगरपालिका कार्यालयले एक हप्ताका लागि अत्यावश्यकबाहेकका अन्य सबै सेवा सुविधा बन्द गर्ने निर्णय गरेको छ । देवघाटमा दुई र बन्दीपुरमा एक जना कोरोना सङ्क्रमित भेटिएका छन् । देवघाट गाउँपालिकाले साउन २९ गतेदेखि भदौ ३ गतेसम्म लकडाउन घोषणा गरेको गाउँपालिकाका अध्यक्ष दुर्गबहादुर थापाले बताउनुभयो ।
त्यसैगरी बन्दीपुर गाउँपालिकामा एक जनामा कोरोना पुष्टि भएपछि साउन ३० गतेदेखि भदौ २ गतेसम्मको लागि लकडाउन गरिएको छ । समुदायस्तरमा कोरोना देखिन थालेपछि सुरक्षाकोदृष्टिले लकडाउन गरिएको गाउँपालिकाका अध्यक्ष पूर्णसिं थापाले बताउनुभयो ।
त्यसैगरी आँबुखैरेनी गाउँपालिकाको छिमेकी नगरपालिका तथा गाउँपालिकाको समुदायस्तरमा कोरोना सङ्क्रमण देखिन थालेपछि उच्च जोखिममा रहेको भन्दै एक हप्ताका लागि बन्द गरेको छ । भदौ १ आजदेखि लागू हुने गरी एक हप्ताका लागि बजार तथा कार्यालयका अत्यावश्यक सेवाबाहेकका अन्य सेवा सञ्चालन गर्न रोक लगाइएको अध्यक्ष गिरबहादुर थापाले जानकारी दिनुभयो । गाउँपालिका क्षेत्रमा हुने आवतजावतबाट आमनागरिक, उद्योगी, व्यवसायी, व्यापारी, कार्यालय, वित्तीय संस्थामा कार्यरत कर्मचारी उच्च जोखिममा पर्ने देखिएकाले बन्द गरिएको गाउँपालिकाले जनाएको छ । रासस
