चितवन । उपप्रधान तथा गृहमन्त्री रवि लामिछानेले गोर्खा मिडिया नेटवर्कका अध्यक्ष गितेन्द्रबाबु (जीबी) राई मलेसियामा रहेको पत्ता लागेको बताएका छन्।
भरतपुर विमानस्थलमा पत्रकारहरूसँग कुरा गर्दै गृहमन्त्री लामिछानेले मलेसियाको गृहमन्त्रीसँग कुरा भएर राईको लोकेसन पत्ता लागेको बताएका हुन्।
उनले भने, “यस विषयमा अनुसन्धान धेरै नजिकमा आइपुगेको छ। योबीचमा मलेसियाका गृहमन्त्रीसँग मेरो २ पटक कुराकानी भएको छ । ३र४ दिन अगाडि पनि मेरो उहाँसँग कुराकानी भएको छ । हाम्रो सुपुर्दगी सन्धि नभएका कारणले अलिकति कूटनीतिक पहलहरूमा समय लागेको छ । तर नजिक छौं । हाम्रो कोसिस दिनरात हामी गरी नै रहेका छौं । मलाई गृहमन्त्रीले नै कन्फर्म गर्नु भएको छ लोकेसन ।”
सूर्यदर्शन सहकारीका संस्थापक अध्यक्ष समेत रहेका राईविरुद्ध बचतकर्ताको १ अर्ब रुपैयाँभन्दा बढी रकम अपचलन गरेको अभियोग लागेको छ । राईसहित १९ जनाविरुद्ध २०८० असोज १८ मा दायर सहकारी ठगीसम्बन्धी मुद्दा कास्की जिल्ला अदालतमा विचाराधीन छ। हाल मुद्दाका प्रतिवादीमध्ये ५ जना पक्राउ परी पुर्पक्षका लागि कारागारमा छन् भने राईसहित १४ जना फरार रहेको छन्।
