झापाको मेचीनगरमा बिहीबार बिहान हात्ती मृत फेला परेको छ । हात्ती सूचना केन्द्र बाहुनडाँगीका अनुसार मेचीनगर–३ स्थित निन्दा खोलाको पश्चिमतर्फ धरधरे ग्राउण्ड नजिक मृत हात्ती फेला परेको हो ।
बिहानै भाले हात्ती मृत फेला परेको र शरीरमा देखिने प्रकारको कुनै पनि चोटपटक नरहेको स्थानीयले बताएका छन् ।
विद्युतीय धराप लाग्दा हात्ती सोही ठाउँमा नै मर्ने भएकाले विद्युतीय धरापमा परेकोजस्तो नदेखिएको डिभिजन वन कार्यालय झापाका अधिकृत जीवन पाठकले जानकारी दिए । फुड पोइजनिङका कारण हात्ती मरेको हुनसक्ने पनि उनको भनाइ छ ।
योसहित झापाका विभिन्न पालिकामा अहिलेसम्म २० वटा हात्ती विभिन्न कारणले मरिसकेका छन् । धेरैजसो हात्ती विद्युतीय तार बारमा परेर मरेको बताइन्छ ।
केही दिनदेखि यो क्षेत्रमा ३० देखि ४० सम्मको सङ्ख्यामा हात्तीहरू ओहोरदोहोर गर्दै आएका थिए ।
