काठमाडौं । वाणिज्य बैंकहरुले गत वर्षको असार मसान्तसम्म ६४ अर्ब १५ करोड ३० लाख रुपैयाँ खुद नाफा कमाएका छन् ।
अघिल्लो वर्षको यसै अवधिको तुलनामा वाणिज्य बैंकहरुको नाफा १३.४० प्रतिशतले धेरै हो । अघिल्लो वर्ष बैंकहरुले ५६ अर्ब ५७ करोड ४४ लाख रुपैयाँ नाफा आर्जन गरेका थिए ।
असार मसान्तसम्म सबैभन्दा धेरै खुद नाफा कमाउनेमा नबिल बैंक रहेको छ । यस अवधिमा नबिल बैंकले ७ अर्ब ६ करोड रुपैयाँ बराबरको खुद नाफा आर्जन गरेको छ । अघिल्लो वर्षको तुलनामा बेंकको नाफा १०.२३ प्रतिशतले धेरै हो ।
यस्तै, ६ अर्ब १ करोड नाफासहित दोस्रो स्थानमा ग्लोबल आइएमई बैंक रहेको छ । यद्यपी अघिल्लो वर्षको तुलनामा बैंकको खुद नाफा भने १०.१३ प्रतिशत घटेको हो । तेस्रो स्थानमा नेपाल इन्भेष्टमेन्ट मेगा बैंकको रहेको छ । असार मसान्तसम्म बैंकले ५ अर्ब १० करोड रुपैयाँ नाफा कमाएको छ । अघिल्लो वर्षको तुलनामा बैंकको नाफा ३९.७१ प्रतिशतले बढेको हो ।
त्यस्तै, सबैभन्दा कम नाफा आर्जन गर्नेमा माछापुच्छ्रे बैंक रहेको छ । अघिल्लो वर्षको तुलनामा बैंकको नाफा २३.०९ प्रतिशतले घटेको छ । असार मसान्तसम्म यस बैंकले १ अर्ब २५ करोड रुपैयाँ नाफा आर्जन गरेको छ ।
