जनादेश, घोराही ।
घोराही उपमहानगरपालिकाले कोरोना भाइरस रोकथामका लागि जोमिमा खट्ने स्वास्थ्यकर्मीहरुलाई प्रोत्साहन भत्ता प्रदान गरेको छ ।
उपमहानगरले अति जोखिम र जोखिममा काम गर्ने गरी दुई भागमा विभाजन गरेर स्वास्थ्यकर्मी तथा त्यहाँ खट्ने कर्मचारीहरुलाई भत्ता प्रदान गरेको हो ।
उपमहानगरले आइसोलिएशनमा खट्ने स्वास्थ्यकर्मी तथा कार्यालय सहयोगीहरुलाई मासिक तलबमा थप ७५ प्रतिशत भत्ता दिएको छ । आइसोलेशनको ल्यावमा काम गर्ने स्वास्थ्यकर्मीहरुलाई पनि अति जोखिम अनुसार ७५ प्रतिशत भत्ता प्रदान गरिएको छ ।
हालसम्म अति जोखिममा रहेर काम गर्ने २० जना स्वास्थ्यकर्मीले ७५ प्रतिशत भत्ता लिएको स्वास्थ्य शाखा प्रमुख नारायणप्रसाद घर्तिले जानकारी दिनुभयो । कोरोना संक्रमण पोजेटिभ भएका स्वास्थ्यकर्मीलाई पनि ७५ प्रतिशत भत्ता उपलब्ध गराइएको छ ।
क्वारेन्टाइन व्यवस्थापनमा खटेका स्वास्थ्यकर्मीहरु लाई पनि ५० प्रतिशत प्रोत्साहन भत्ताको व्यवस्था गरिएको छ ।
