जनादेश बागलुङ ।
गृहमन्त्री राम बहादुर थापा बागलुङ प्रस्थान गरेका छन् ।
बागलुङको ढोरपाटन नगरपालिकास्थित भुजीखोलामा गएराति आएको बाढी पहिरोले जनधनको विनाश गरेपछि गृहमन्त्री घटनास्थलको अवलोकन र पीडित परिवारसँग भेट्न जिल्ला गएका हुन् ।
थापाको सचिवालयले गृहमन्त्री हेलिकोप्टरमा बागलुङ प्रस्थान गरेको पुष्टि गरेको छ । त्यहाँ बाढीपहिरोले अहिलेसम्म १० जनाको मृत्यु भएको छ भने थप ४१ जना बेपत्ता भएका छन् ।
मृत्यु हुनेमा ४ पुरुष, १ बालिका, ५ जना महिला गरी १० अहिलेसम्म जनाको शव फेला परेको छ।
मृतक मध्ये ढोरपाटन ९ की २८ वर्षीया केसमाया विकको मात्र सनाखत भएको छ। बुधबार राति करिब १२ बजे भूजीखोलामा आएको बाढीले ढोरपाटन वडा नम्बर ५, ६, ७, ८ र ९ का ३० घर बगाएको ढोरपाटनका स्थानीय जीवन पुनले जानकारी दिएका छन् ।
बाढीले सडक छेउमा पार्किङमा राखेको जीप, दुई वटा विद्युत गृह, एक वटा झोलुङ्ले पुल, दुई वटा विद्यालय भवनसमेत बगाएको छ । ढोरपाटन नगरपालका ९ को लाँकुरीबोट १५ घर, दुनेपँधेरामा ५ घर, घट्टबोटमा ८ घर र सुप्राङ २ घर बगाएको छ भने सरस्वति आधारभुत विद्यालय र जनचेतना प्राथमिक विद्यालयसमेत बाढीले बगाएको छ ।
अहिले घटनास्थलमा प्रहरी पुगेर स्थानीयको सहयोगमा उद्धार थालेको जिल्ला प्रहरी कार्यालय बागलुङका प्रहरी नायब उपरीक्षक राजेन्द्र रेग्मीले जानकारी दिए । अहिले थप सुरक्षाकर्मीसहित घाइतेहरुको उद्धार, बेपत्ता भएकाहरुको खोजी सुरु गरिसकेको प्रहरी नायब उपरीक्षक रेग्मीले बताए ।।
