जनादेश, काठमाडौँ ।
सर्वोच्च अदालतले आफ्नै श्रीमतीको हत्या अभियोगमा जन्म कैदको सजाय भोगीरहेका सशस्त्र प्रहरीका पूर्वडिआइजी रञ्जन कोइरालाको सजाय घटाइदिएको छ ।
प्रधानन्यायाधीश चोलेन्द्रशमसेर राणा र न्यायाधीश तेजबहादुर केसीको इजलासले कोइरालाको जन्मकैद सजाय घटाएको हो । कोइरालाले साढे ८ वर्षअघि श्रीमती गीता ढकालको हत्या गरी शव प्लास्टिकमा पोको पारेर मकवानपुरको टिष्टुङ जंगलमा लगेर पेट्रोल छर्की जलाएका थिए । अनुसन्धानमा प्रहरील ढकालको हाधा जलेको शव भेटाएको थियो ।
श्रीमती ढकालले व्यापारका लागि पैसा मागेपछि चर्किएको विवादका कारण कोइरालाले रिसको आवेगमा धकेल्दा ढकालको मृत्यु भएको जनाउदै सर्वोच्चले सजाय घटाएको हो । हत्या हुनुमा मृतक ढकालकै दोष रहेको देखाउदै सर्वोच्चले कोइरालाको जन्मकैदको सजाय घटाएर ८ वर्ष ६ महिना बनाएको छ । जस अनुसार कोइराला यही साउन ८ गते रिहा हुने देखिएको छ ।
