जनादेश, काठमाण्डौं । पूर्व प्रधानमन्त्री एवं जनता समाजवादी पार्टीका संघीय परिषद् अध्यक्ष डा. बाबुराम भट्टराईले नेकपा एमालेलाइ नव फासीवादी भएको आरोप लगाएका छन् ।
सामाजिक सञ्जाल ट्वीटरमा भट्टराइले प्रमुख प्रतिपक्षी दल नेकपा एमाले बहुदलीय जनवादको खोलभित्र एकदलीय सर्वसत्तावादको अभ्यास गरिरहेको उल्लेख गरेका हुन् ।
अध्यक्ष भट्टराइले ६ महिनादेखि संसद् अवरुद्ध गर्ने र सर्वदलीय बैठक बहिष्कार गर्नेहरू कसरी लोकतन्त्रबादी हुन सक्छन् भन्ने प्रश्न गरेका छन् ।
अध्यक्ष भट्टराइले वैधानिक सरकारले बोलाएको सर्वदलीय बैठक निरन्तर बहिष्कार गर्नेहरू बहुदलीय जनवादको खोलभित्र एकदलीय सर्वसत्तावादको अभ्यास गर्ने नवफासीवादी तत्त्व भएको भन्दै एमालेप्रति आक्रामक बनेका हुन् ।
ट्वीटरमा भट्टराइले तानाशाही हिट्लरले पनि मार्ग निर्देशक सिद्धान्त राष्ट्रिय समाजवाद भनेको र उनी पनि चुनावबाटै आएको भन्दै भट्टराइले हिटलरको बाटोसँग एमालेको राजनीति तुलना गरेका छन् ।
उता एमाले नेता गोकूल बाँस्कोटाले अध्यक्ष भट्टराइले ट्वीटरमै जवाफ फर्काउदै नागरिकलाइ घरभित्रै थुनेर जिउदै जलाउने र ४ बर्षीया बालिकालाइ बसभित्रै जलाएर मार्ने हत्याराले एमालेलाइ आरोप लगाउने भन्दै प्रश्न गरेका छन् ।
बाँस्कोटाले जसपाका नेतृ रेणु यादवको राजीनामा रोक्न सार्वजनिक धम्की दिएको भन्दै विदेशी एजेण्डा बोकेर उफ्रेर एमालेमा केही फरक नपर्ने टिप्पणी गरेका छन् ।
