देशभर थप १० हजार ३१९ जनामा कोरोना संक्रमण पुष्टि भएको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभर २१ हजार २०१ जनामा कोरोना परीक्षण गरिएको थियो । जसमा पीसीआर परीक्षणबाट ८ हजार ५४ र एन्टिजेन परीक्षणबाट २ हजार २६५ जनामा कोरोना संक्रमण पुष्टि भएको हो ।
त्यस्तै, सोही अवधिमा चार जना संक्रमितको मृत्यु भएको छ भने २ हजार ५४० जना संक्रमण मुक्त भएका छन् । हाल देशभर कुल ८२ हजार ५५० जना सक्रिय संक्रमित रहेका छन् ।
मन्त्रालयका अनुसार आज काठमाडौं उपत्यकामा मात्रै ४ हजार ६७६ जनामा कोरोना संक्रमण भेटिएका छन् । काठमाडौँमा ३ हजार ६३४ , ललितपुरमा ५८७ र भक्तपुरमा ४५५ जनामा कोरोना संक्रमण पुष्टि भएको हो । यससँगै उपत्यकामा सक्रिय संक्रमितको संख्या ३८ हजार ५८१ पुगेको छ।
