एक क्वीन्टल सुन तस्करी प्रकरणको अनुसन्धान गरिरहेको राजश्व अनुसन्धान विभागको टोलीले शनिबार रातभर ठमेल र टोखा क्षेत्रमा अप्रेसन चलाएको छ । ठमेलको भियाना होटल र टोखाको एक फ्याक्ट्रीमा विभागनको टोलीले छापा मारेको छ ।
विभाग स्रोतका अनुसार टोखाको फ्याक्टीमा सुन गाल्ने र रि(फ्रेम गरेर अर्कै स्वरुपमा परिणत गर्ने मेसिन नै फेला परेको छ । फ्याक्ट्री छापा मारेर राजस्वको टोलीले अहिले सिल गरेर राखेको छ । विभागको टोलीले टोखाको फ्याक्टीबाट आगो बाल्नका लागि राखिएका काठका धुलोका बोराहरु, सुन गाल्न प्रयोग हुने मेसिन, एसिडका बट्टाहरु, गालेको सुन पकड्ने र राख्ने ह्याण्डलहरु लगायत बरामद गरेको छ ।
त्यस्तै ठमेलको होटल भियानामा पनि राजस्वको टोलीले छापा मारेको छ । होटललाई पनि अहिले सिल गरिएको छ । राजश्व अनुसन्धान विभागको टोलीले भियनामा छापा मारेर केही कागजात र सामग्रीहरु बरामद गरेको छ । होटलबाट एक जना नेपाल मुलका तर, बेल्जिनिमका नागरिकलाई पक्राउ गरेको छ ।
पक्राउ परेका ती व्यक्तिको संलग्नता पुष्टि हुने आधारहरु देखिएपछि पक्राउ गरेर सोधपुछ भइरहेको छ । राजश्व अनुसन्धान विभागको टोलीले २ साउनमा त्रिभुवन अन्तर्राष्ट्रिय विमानस्थलको भन्सार जाँच पार गरेर बाहिरिएको एक क्वीन्टल सुन सिनामंगलबाट बरामद गरेको थियो ।
‘यो सुन तस्करको समूह सोचेभन्दा निकै ठूलो देखियो, राजधानीमा अर्कै फ्याक्ट्री खोलेर सुनलाई अर्कै स्वरुपमा परिणत गराउने गरेको देखिएको छ’, अपरेशनमा खटिएका एक अधिकारीले भने । यद्यपि, कस्तो स्वरुपमा सुन परिणत गरिन्थ्यो भन्ने खुलिसकेको छैन ।
अपरेशनमा खटिएका अधिकारीहरुका अनुसार, टोखाको फ्याक्ट्री र त्यहाँबाट बरामद सामानहरु हेर्दा यो गिरोहले ठूलो परिणामको सुन गालेर लगेको हुनसक्ने देखिएको छ । त्यसता हालसम्म यो प्रकरणमा विभागले १८ जनालाई नियन्त्रणमा लिएको छ । ४ साउनमा यो प्रकरणमा विभागले त्रिभुवन अन्तर्राष्ट्रिय विमानस्थलबाट चिनियाँ नागरिक ज्यास्याङ लिन पक्राउ परेका थिए ।
हालसम्मको अनुसन्धानले सुन प्रकरणमा पक्राउ परेका १८ जनामध्ये सबैभन्दा उच्च तहका उनी नै भएको देखिएको छ । पक्राउ परेका मध्ये एक आरोपीको बयानका आधारमा विभागको टोली टोखाको फ्याक्ट्रीसम्म पुगेको हो ।
