सिमकोट,
हुम्लाको दक्षिणी क्षेत्रमा रहेको ताजाँकोट गाउँपालिकाका बाढीपीडितको पालमुनिको बास भएको छ । गत साउन ३१ गते गएको बाढीपहिराबाट विस्थापन भएपछि ताजाँकोट वडा नं ३,४ र ५ का बासिन्दा अहिले पालमुनि बस्दै आएका छन् ।
गत साउनको अन्तिमतिर लगातार परेको अविरल वर्षाका गाउँपालिकामा मात्रै तीन सय घरपरिवार विस्थापन भएको तथा दर्जनौँ घर भत्किएको ताजाँकोटबाट गोपाल बुढाले जानकारी दिनुभयो ।
छप्रेलाबजारका घर, होटेल र पसल गरी २० घरधुरी र गाउँपालिका कार्यालयसमेत पहिराको जोखिममा रहेको वडा नं ४ का वडाध्यक्ष प्रशान्त धमलाले बताउनुभयो । बाढीपहिराले घर भत्किएपछि अहिले त्यहाँका बासिन्दा हेलिप्याडको चौरमा पाल टाँगेर बस्दै आएका छन् ।
छप्रेलामा जताततै बाढीपहिरो गएका कारण पीडितलाई बास बस्ने ठाउँको समस्या भएको गाउँपालिकाका उपाध्यक्ष मञ्जु बुढाले बताउनुभयो । बाढीपहिराले त्यस क्षेत्रका खेतबारीका धान, कोदो, चिनो लगायत बालीनालीसमेत बगाएको छ । रासस
