काठमाडौं । नेपाल उद्योग परिसंघले सी.जी. फुड्समा भएको आक्रमणको घटनाप्रति गम्भिर ध्यानाकर्षण गराएको छ ।
आज एक विज्ञप्ति जारी गर्दै परिसंघले सी.जी. फुड्समा कार्यरत कर्मचारीमाथि हातपात एवं भौतिक सम्पत्ति तोडफोड गरिएको घटना निन्दनिय भएको बताएको हो । परिसंघले देशकै प्रमुख औद्योगिक घराना चौधरी ग्रुपबाट सञ्चालित उद्योगमाथि भएको आक्रमणमा संलग्न जो कोहीलाई कानूनी दायरामा ल्याउन माग समेत गरेको छ ।
त्यस्तै, निजी क्षेत्रमाथि हुने यस्ता हमलाले लगानीको वातावरण बिग्रने र समृद्ध अर्थतन्त्रको प्रयासमा गम्भिर असर पर्ने परिसंले जनाएको छ ।
“हालको विषम परिस्थितीमा निरुत्साहत बनिरहेको निजी क्षेत्रको मनस्थितीलाई यस्ता घटनाले थप हतोत्साही बनाउने, लगानीको वातावरण बिग्रने र समृद्ध अर्थतन्त्रको प्रयासमा गम्भिर असर पार्ने भएकाले यस्ता कार्यलाई निरुत्साहित गर्न कडा रुपमा प्रस्तुत हुन नेपाल सरकार, प्रशासन एवं सम्वन्धित सरोकारवालाहरुको गम्भिर ध्यानाकर्षण गराउन चाहन्छौं,” परिसंघद्वारा जारी विज्ञप्तिमा भनिएको छ ।
