नेकपा माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल प्रचण्डले अमेरिकाको डिजाइनमा नयाँ सरकार बनेको दाबी गरेका छन् ।
शनिबारको स्थायी कमिटी बैठकमा बोल्दै उनले सात समुद्रपारिबाट केपी शर्मा ओलीको नेतृत्वमा नयाँ सरकार बनाइएको बताएका हुन् ।
सरकार बनाउन छिमेकी नभई सात समुद्रपारिको शक्ति हाबी भएको उनको दाबी थियो । गत असार १७ मा बनेको नयाँ गठबन्धन सरकारलाई भारत र चीनले समेत नरुचाएको उनले जिकिर गरे ।
‘मैले केही कुरामा अडान लिएपछि नेपालमा हठात् सरकार परिवर्तनको खेल भयो,’ बैठकमा उनले भने, ‘यो यहाँ विकसित भएको घटनाक्रम होइन सात समुद्रपारिबाट सब भएको हो ।’
बंगलादेशमा भएको सरकार परिवर्तनको आन्दोलनले नेपालको सत्ता गठबन्धनसमेत डराएको उनको दाबी छ । नेपालमा पनि केही समयमा आन्दोलन उठ्ने र त्यसको नेतृत्व माओवादीले गर्ने उनले बताए ।
