कोरोना भाइरस नेपाल: थप ११८ जनामा कोभिड-१९ पुष्टि

यो वृद्धिसँगै शुक्रवार अपराह्णसम्म देशभरि पुष्टि भएका सङ्क्रमितको कुल सङ्ख्या १६६४९ पुगेको छ।

तीमध्ये ८,०११ जना निको भएका छन् भने ३५ जनाको मृत्यु भएको मन्त्रालयको तथ्याङ्कले देखाएको छ।

मन्त्रालयका प्रवक्ता डा. जागेश्वर गौतमका अनुसार विगत २४ घण्टामा १२० जना भाइरसमुक्त गएर घर फर्किएका छन्।

शुक्रवार पुष्टि भएका सङ्क्रमितहरू काठमाण्डूसहित विभिन्न जिल्लाका हुन्।

छ जिल्ला सङ्क्रमणमुक्त

धनकुटा, भोजपुर, सोलुखुम्बु, मनाङ, मुस्ताङ र हुम्ला जिल्ला सङ्क्रमणमुक्ता भएको डा. गौतमले बताए।

त्यस्तै छ जिल्लामा भने ५०० भन्दा बढी उपचाररत कोभिड-१९ का बिरामी रहेका छन्। ती छ जिल्लाहरू महोत्तरी, रौतहट, पाल्पा, अछाम, कैलाली र बाजुरा रहेका छा्।

शुक्रवार सङ्क्रमितमध्ये सबैभन्दा धेरै वागमती प्रदेशमा ५१ जना रहेका छन्।

अरू तथ्याङ्क के छ ?

विगत २४ घण्टामा पीसीआर विधिबाट ४,८०६ वटा परीक्षण भएको मन्त्रालयले जनाएको छ।

यससँगै अहिलेसम्म पीसीआर विधिबाट भएका परीक्षणको सङ्ख्या २,७५,९५१ पुगेको छ।

सरकारले आरडीटी भने प्रयोग गर्न छोडेकोछ ।

बिहीवार पुष्टि भएका सङ्क्रमितमध्ये सुर्खेतका १८, बझाङका १६, कैलालीका आठ र काठमाण्डूका ५ जना छन्।

अहिले देशभरि क्वारन्टीनमा २३,९१० व्यक्ति छन्।