जनादेश, काठमाडौँ ।
नेपाल कम्युनिस्ट पार्टी नेकपा प्रचण्ड-नेपाल समूहले प्रधानमन्त्री केपी शर्मा ओलीलाई साधारण सदस्य समेत नरहने गरी पार्टीबाटै निष्कासन गरेको छ ।
आज बसेको केन्द्रीय समितिको बैठकमा प्रचण्ड–नेपाल समूहका अध्यक्ष पुष्पकमल दाहाल ‘प्रचण्ड’ ले ओलीलाई पार्टीबाट निष्कासन गर्ने र पौडेललाई महासचिवबाट हटाउने प्रस्ताव पेश गरेका थिए । बैठकले सो प्रस्ताव पारित गरेसँगै महासचिव विष्णु पौडेललाई पनि पदबाट हटाइएको छ ।
यसअघि प्रचण्ड-नेपाल समूहले ओलीलाई स्पष्टीकरणका लागि माघ ५ मा तीन दिनको अल्टिमेटम दिएको थियो । तर, ओलीले स्पष्टीकरण दिएका थिएनन् । ओलीले एकलौटी निर्णय गर्दै प्रतिनिधिसभा विघटन गरेपछि नेकपा दुई चिरामा बाँडिएको छ । हाल ओलीको असंवैधानिक कदमविरुद्ध देशभर चरणबद्ध आन्दोलन भइरहेका छन् ।
