चितवन । माडी–ठोरी जोड्ने वैकल्पिक पुलको उद्घाटन भएको छ । बागमती प्रदेशका भौतिक पूर्वाधार विकास मन्त्री युवराज दुलालले शुक्रबार एक कार्यक्रमका बीच भरतपुर महानगरपालिका वडा नम्बर २४ केरुङ्ग खोलामा बनेको पुल उद्घाटन गरेका हुन् ।
प्रदेश सरकारको रु ७ करोड ९८ लाख १८ हजारको लागतमा निर्माण गरिएको पुल ७४ मिटर लम्बाई र फुटपाथसहित ८ दशमलव ४ मिटर चौडा रहेको छ । वि.सं. २०७९ साल चैत १९ गते सम्झौता भई निर्माण सुरु भएको पुल म्याद सकिन भन्दा ६ महिना अगाडि निर्माण सम्पन्न भएको हो ।
कार्यक्रममा बोल्दै पूर्वाधार मन्त्री दुलालले पूर्वाधार विकासमा जनतालाई अनुभूति दिने गरी विकास निर्माणमा प्रदेश सरकार लागि परेको बताए । जनतालाई विकास दिन प्रदेश सरकार तत्पर रहेको उनको भनाई छ । यस्तै, बजेट अभावका कारण प्रदेश सरकारले जनताको अपेक्षाअनुसार योजनाहरु बढाउन नसकेकोे मन्त्री दुलाले बताए ।
पुलले भरतपुर २३ र २४ नम्बरलाई जोडेको छ । कार्यक्रममा निर्धारित मितिभन्दा अगाडि नै पुल निर्माण सम्पन्न गरेकोमा निर्माण कम्पनी केबिसी बिल्डर्सलिमिटेडका प्रमुख कुमार आचार्यलाई सम्मान गरिएको छ ।
