जनादेश अपडेट ।
नेकपा प्रचण्ड–नेपाल पक्षले आज देशव्यापी आमहड्तालको आह्वान गरेपछि काठमाडौं लगायतका सहरी क्षेत्र विहानैदेखि सुनसान देखिएका छन् ।
सरकारले संविधानलाई बेवास्ता गर्दै संवैधानिक निकायहरुमा नियुक्ति गरेको भन्दै त्यसको विरोधमा आज देशव्यापी आम हड्ताल आह्वान गरिएको हो ।
आम हड्तालको पूर्वसन्ध्यामा काठमाडौंमा बुधबार साँझ ब्यापक मसाल जुलुस निकालिएको थियो ।
उता, आमहड्तालको घोषणासँगै सरकारले काठमाडौंको सुरक्षा व्यवस्था कडा बनाएको छ । काठमाडौंका केही स्थानमा बन्द सफल पार्न खटिएका नेताहरु पक्राउ समेत परिसकेका छन् ।
गृहमन्त्रालयले बुधबार नै विज्ञप्ति जारी गर्दै निर्वाधरुपमा यातायात–व्यवसाय सञ्चालन गर्न आग्रह गरेको थियो । बिहानैदेखि बन्द गर्न हिँडेका प्रचण्ड–नेपाल समूहका कार्यकर्ताहरुलाई प्रहरीले पक्राउ गरिरहेको छ ।
यातायात, पसल, उद्योग व्यवसाय, कलकारखाना र शिक्षण संस्था बन्द हुने तर आमहड्तालका क्रममा अस्पताल, एम्बुलेन्स, पानी, दूध, औषधिलगायतका अत्यावश्यक सेवाहरुमा अवरोध नगर्ने स्पष्ट पारेको छ । यस्तै विद्यार्थीहरुको परीक्षा सञ्चालनमा पनि कुनै अवरोध नहुने नेतृ पम्फा भुसालले जानकारी दिइन् ।
