जनादेश विकास विशेष ।
छिमेकी मुलुक चीनले वितेको चार दशकमा भौतिक पूर्वाधार र रेल तथा रोड संरचना विकासमा अपत्यारिलो फड्को मारेको छ । हालै चीनको राष्ट्रिय समाचार एजेन्सी सिन्हुवाले दक्षिणी चीनमा पर्ने क्वाङ्सी चुआङ अटोनोमस रिजनको लुओछङ मुलाओस्थित टोङमन टाउनसिपको भौतिक पूर्वाधार विकास झल्किने आकाशबाट लिइएका एरियल तस्विरसहितको फिचर प्रकाशित गरेको छ ।
नेपाल जस्तै पहाडी भूभाग रहेको उक्त क्षेत्रमा यातायात तथा भौतिक पूर्वाधारका क्षेत्रमा तीव्र गतिमा काम भैरहेको छ ।
यहाँको स्थानीय सरकारले भौतिक पूर्वाधार एवं यातायातका पूर्वाधारमा लगानी बढाएपछि गरिवी निवारणमा महत्वपूर्ण परिणाम देखिएको उक्त समाचारमा उल्लेख छ ।
चीनले हाइस्पिड रेल विस्तारमा त चमत्कार नै गरेको छ । चीनमा सन् २ हजार १८ को अन्त्यसम्म १ लाख ३१ हजार किलोमिटरको रेलमार्ग बनिसकेको छ ।
चीनमा हाल २५ हजार किलोमिटर भन्दा बढी दुरीको हाइस्पिड रेल लाइन छ जुन संसारमा रहेको कुल हाइस्पिड रेल मार्गको दुईतिहाई भन्दा पनि बढी हो ।
चाइना रेलवे कर्पका अनुसार चीनमा हरेक दिन ४ हजार हाइस्पिड रेलले ४० लाख भन्दा बढी यात्रु ओसार्ने गर्छन् । वर्षमा १ अर्ब ७ करोड हाराहारी चिनियाँले रेलसेवा प्रयोग गर्ने गरेको तथ्याङ्क छ । सन् २ हजार २० भित्र चीनमा ३० हजार किलोमिटरको हाइस्पिड रेल सञ्जाल बनिसक्ने छ जसले देशका ८० प्रतिशत मुख्य शहरसम्म तीव्र गतिको स्थलयात्रा सहज हुने छ ।
सन् २०१० मा दोस्रो अर्थतन्त्रमा दरिएको चीनले पूर्वाधार निर्माणको क्षेत्रमा संसारलाई जादु नै देखाएको छ । विश्वभरमा प्रयोग हुने स्टिल र सिमेन्टको कुल हिस्सामध्ये आधा चीनमा मात्र प्रयोग हुन्छ ।
अधिकाँश चिनियाँहरु अहिले हवाइ सेवाको सहज विकल्पकोरुपमा तुलनात्मकरुपमा सस्तो खर्चमा रेल चढेर उत्तिकै समयमा गन्तब्यमा पुग्न सक्छन् ।
चीनमा संसारमै सबैभन्दा व्यवस्थित रेलको टिकट विक्री गर्ने प्रणाली भएको बताइन्छ ।
यो पनि हेर्नुस् –
चीनमा गरिवी निवारणको चमत्कारः यसरी धनी बन्दैछन् विपन्न गाउँहरु (तस्विर सहित)
चीनले कसरी जित्यो कोरोनाः चिनियाँ राष्ट्रपतिको जवाफ (भिडियोसहित)
